საერთო ბრძოლა (ანუ ვის შეუძლია ქვეყნის კრიზისიდან გამოყვანა)
სტატიის ავტორი: პაპუნა ტოლიაშვილი
1 ივნისი, 2009 | წაკითხულია 3 518-ჯერ
ქვეყნის გამოყვანა ეკონომიკური კრიზისიდან, რომელშიც ახლა ვიმყოფებით, არის უპირველესი ამოცანაა ყველასთვის, ყველა დონეზე. ის, რაც უპირველესად ამ ამოცანას არ ისახავს მიზნად, არის ფუჭად დახარჯული ენერგია და დაკარგული შანსი იმისა, რომ ცოტა უფრო ნაკლები ყოფილიყო კრიზისის უარყოფითი ეფექტი, ან დაჩქარებულიყო ქვეყნის ამ მდგომარეობიდან გამოყვანა.
კრიზისი ყოველდღიურად ართულებს ბევრი ორგანიზაციის მდგომარეობას, ამცირებს მათი გადარჩენის შანსს. სულ უფრო მეტი ორგანიზაციისათვის საფრთხე სულ უფრო თვალნათელი ხდება. და თუ ვინმემ ამაზე სასწრაფოდ არ იზრუნა, სიტუაცია, შესაძლოა, სავალალო მდგომარეობამდე მივიდეს. გაკოტრებული, ქმედუნარიანობა დაკარგული ორგანიზაციები ემუქრებიან ასიათასობით ადამიანს უმუშევრობით, მილიონობით ადამიანს საჭირო პროდუქტის გარეშე დატოვებით, სახელმწიფოს შემოსავლების შემცირებით და ძალიან ბევრ ოჯახს _ სიღატაკით.
ყველას, ვისაც შეუძლია, ვალდებულია, დადგეს კრიზისის წინააღმდეგ, როგორც ერთი და ეცადოს _ მაქსიმუმი გააკეთოს ქვეყნის ამ მდგომარეობიდან გამოსაყვანად.
სამი მხარე: საზოგადოება, ბიზნესი და ხელისუფლება, მათი ერთიანობა, კოორდინირებული შეთანხმებული მოქმედება არის ერთადერთი შანსი, დაიძლიოს კრიზისი მინიმალური უარყოფითი შედეგებით. ამ სამ მხარეს, ერთმანეთს შორის, როლების ისე განაწილება სჭირდებათ, თანმიმდევრული, კარგად გააზრებული ნაბიჯები იმისთვის, რომ თითოეულის მიერ გაწეული ძალისხმევა მაქსიმალურად ეფექტური იყოს საბოლოო შედეგის მისაღებად.
ხელისუფლების როლი
ხელისუფლების ვალდებულება ქვეყნის კრიზისიდან გამოყვანაში ყველაზე მძიმეა და ყველაზე რთული. მათ იმის გარდა, რომ ევალებათ ამ პერიოდში განსაკუთრებით იზრუნონ მშვიდობაზე, სიწყნარეზე, სამუშაო და ცხოვრების ტექნიკური პირობების შენარჩუნებაზე, ვალდებულია ყველაფერი გააკეთოს სამი მთავარი მიმართულებით:
ა) პირველ რიგში ძალისხმევა მაქსიმალურად უნდა წარიმართოს მცირე და საშუალო ბიზნესის ხელშეწყობისაკენ. ყველაფერი უნდა გაკეთდეს ამისათვის: გაუმჯობესდეს გარემო, ხელი შეეწყოს მათ კოოპერაციას, დაეხმაროს იმაში, რომ თითოეული ბიზნეს წარმონაქმნი, რომელიც მარტო ვერ გადაჭრის ამ პრობლემას, მეტი ზრუნვის ობიექტი გახდეს, გახდეს უფრო ეფექტური და ძლიერი სახელმწიფოს თანადგომის მეოხებით,ეს აბსოლუტური აუცილებლობაა კრიზისის უარყოფითი ეფექტების შესამცირებლად.
ბ) მეორე და არანაკლებ მნიშნელოვანი პრიორიტეტი ხელისუფლებისთვის არის ინვესტიციების (როგორც პირდაპირი, ისე შუამავალი ინსტიტუტების მეშვეობით) მოზიდვა ქვეყანაში. ყველა გზა და მეთოდი უნდა იყოს გამოყენებული ამისათვის. თუკი რაიმეს აქვს პერსპექტივა საქართველოში ის საუკეთესო მხრიდან უნდა მიეწოდოს პოტენციურ ინვესტორებს შესაბამისი დაპირებებით, გარანტიებით. შემოსული ინვესტიციები ყველაზე სწრაფად არბილებს ფონს და იძლევა ამოსუნთქვის საშუალებას. ამდენად, ამ მიმართულებით გადადგმული ნაბიჯების ეფექტურობაზე მნიშვნელოვნად არის დამოკიდებული ქვეყნის კრიზისიდან გამოსვლის ვადა და სირთულე.
გ) და მესამე, ასევე პირველი პრიორიტეტის ამოცანა ამ პერიოდში არის ექსპორტის მაქსიმალური ხელშეწყობა. ხელისუფლება უნდა იყოს შუამავალი, მაორგანიზებელი, დამხმარე, გამყიდველი და დამაკავშირებელი ბიზნესისათვის გარე სამყაროსთან. მან უნდა შეძლოს, შექმნას ყველა აუცილებელი პირობა ექსპორტის გასაზრდელად. ეს არის კიდევ ერთი კრიტიკულად აუცილებელი ფაქტორი კრიზისიდან გამოსვლის დასაჩქარებლად.
ვინაიდან, რაც უფრო მეტი პროდუქტი იქმნება, რაც უფრო მეტი ინვესტიცია შემოდის და რაც უფრო მეტი პროდუქტი და მომსახურება გადის ქვეყნის გარეთ მით უფრო ნაკლებია კრიზისის უარყოფითი გავლენა ქვეყნის ეკონომიკაზე, ბიზნესზე და საზოგადოებაზე მთლიანად.
ბიზნესის როლი
არანაკლებ დიდი ვალდებულებები აკისრია ბიზნესს ქვეყნის კრიზისიდან გამოსაყვანად. კომპანიების როლი ამ ბრძოლაში არანაკლებ რთულია და საპასუხისმგებლო. მათი უპირველესი ამოცანები ამ პროცესში შემდეგია:
ა) ყველაფერი გააკეთონ იმისთვის, რომ გახდნენ უფრო ეფექტურები ყოველდღიურ მოქმედებაში. დახვეწონ საქმიანობის სტრატეგია, უფრო ცხადი და ეფექტური გახადონ საქმიანობის ბიზნეს მოდელი. გადახედონ და უფრო ცხადად ჩამოყალიბდნენ _ ვისთვის მუშაობენ, რას აკეთებენ მათთვის და როგორ ახერხებენ ამ სარგებლის გადაცემას მომხმარებლებისთვის, შემდეგ კი მთელი მართვის სისტემა დახვეწონ და შესაბამისობაში მოიყვანონ ამ გადაწყვეტილებებთან. არაფერი იმაზე მეტად მნიშვნელოვანი არ არის ამ დროს ბიზნესისთვის, ვიდრე მისი თითოეული რგოლის გამართული და ეფექტური ფუნქციონირება. ამასთან, ზუსტი გაგება იმისა, ვინ არის და რა საზოგადოებრივ სარგებელს ქმნის, რისთვისაც უნდა მიიღოს შედეგი.
ბ) მეორე, უფრო ცხადი და კონკრეტული, მაგრამ ამავე დროს ძალიან მნიშვნელოვანი ამოცანა ბიზნესისთვის ამ პერიოდში არის მის მიერ წარმოებული პროდუქტის და მომსახურების ხარისხის გაზრდა, მისთვის პრიორიტეტული მომხმარებლების მოთხოვნილებების გათვალისწინებით. განსაკუთრებით მნიშვნელოვანია, რომ პროდუქტი, ხარისხის საერთაშორისო სტანდარტზე თუ არა, მეზობელ ქვეყნებში გასატანად აუცილებელ ხარისხზე მაინც იწარმოოს. ყველა კომპანიამ განსაკუთრებით უნდა იზრუნოს ამაზე (თუმცა ხშირად პირიქით ხდება) კრიზისის დროს, ვინაიდან, სხვა შემთხვევაში, ვერც სახელმწიფო და ვერც თვითონ ბიზნესი ვერ შეძლებს ექსპორტის გაზრდას.
გ) და ბოლოს. ყველა ორგანიზაცია უნდა ცდილობდეს, გააფართოვოს კონტაქტები საზღვარგარეთ. შესთავაზოს და დააინტერესოს საკუთარი პროდუქციით, რაც შეიძლება მეტი განსხვავებული კონტრაგენტი, განსხვავებულ ქვეყანაში. ამისთვის ყველა რესურსი უნდა იქნეს გამოყენებული, როგორც კერძო, ისე სახელმწიფოებრივი და საზოგადოებრივი. მთელი ქვეყანა უნდა ცდილობდეს, გაყიდოს რაც შეიძლება მეტი პროდუქტი და მომსახურება ქვეყნის გარეთ, ვინაიდან: რაც უფრო მეტი პროდუქტი იქმნება, რაც უფრო მეტი ინვესტიცია შემოდი და რაც უფრო მეტი პროდუქტი და მომსახურება გადის ქვეყნის გარეთ მიდ უფრო ნაკლებია კრიზისის უარყოფითი შედეგები ბიზნესზე, მის თითოეულ სუბიექტზე და საზოგადოებაზე მთლიანად.
ბანკების როლი მათ შორის:
ბანკებს კრიზისიდან ქვეყნის გამოყვანაში განსაკუთრებულად მნიშვნელოვანი როლი აკისრიათ. მათი უპირველესი მოვალეობაა, ისე დახვეწონ რისკის მართვის სისტემები, რომ კრიზისის და უზრუნველყოფის გაუფასურების მიუხედავად არ შეწყვიტონ დაკრედიტების პროცესი, სხვანაირად ყველა დანარჩენი ძალისხმევა, შესაძლოა, უშედეგო აღმოჩნდეს.
ამის გარდა ბანკებმა უნდა შეძლონ, გაარჩიონ ორგანიზაციები, რომლებსაც აქვთ გადარჩენის შანსი, იპოვონ ისინი და განსაკუთრებულად შეეცადონ მათ დახმარებას. ჯანსაღი საშუალო და მცირე ზომის ორგანიზაციები, რომლებსაც ეფექტური მენეჯმენტი ჰყავს და რომლებიც ბანკებიდან სათანადო მხარდაჭერას მიიღებენ, შეძლებენ გადაარჩინონ ქვეყნის ეკონომიკა. დინოზავრების გადარჩენაზე დახარჯული ფული და დრო ყველაზე დიდი დანაკარგი შეიძლება აღმოჩნდეს საბანკო სისტემისთვის და ქვეყნისთვის მთლიანად.
მესამე, ბანკებმა ერთად და ცალ-ცალკე ყველაფერი უნდა გააკეთონ იმისთვის, რათა კვლავაც ჰქონდეთ მოსახლეობის და ბიზნესის ნდობა. ეს აუცილებელია ფინანსური რესურსების შენარჩუნებისთვის, ეკონომიკის ლეგალურ ჩარჩოებში დასატოვებლად და ქვეყნის ეკონომიკური მდგომარეობის განვითარებისთვის. ჯანსაღი და ეფექტური საბანკო სისტემა არანაკლებ აუცილებელი რგოლია კრიზისიდან ქვეყნის გამოყვანისათვის, ვიდრე ეფექტური სახელმწიფო მმართველობა. სწორედ ამიტომ უნდა მიექცეს მას განსაკუთრებით ყურადღება.
და ბოლოს, საზოგადოების როლი
საზოგადოების როლი, ამჟამად ყველაზე მეტი რისკის ქვეშ დგას ამ კრიზისის გამო. სამი მთავარი პასუხისმგებლობა, რომელიც მას ამ საერთო ბრძოლაში ენიჭება, ყველაზე არსებითია მდგომარეობის გამოსწორებისთვის. საზოგადოების თითოეული წევრი და ყველა ერთად დღეს ვალდებულია:
ა) მაქსიმალურად ლოიალური და აქტიური იყოს ქართული პროდუქტის და მომსახურების მიმართ. ყველა უნდა ცდილობდეს, იყიდოს, რაც შეიძლება მეტი ქართული პროდუქცია. ამას ის უნდა აკეთებდეს არამარტო სამომხმარებლო მოტივაციით, არამედ იმის ღრმა შეგნებით, რომ თითოეული ასეთი ტრანზაქცია არის ქვეყნის კრიზისიდან გამოყვანაში შეტანილი პირადი წვლილი. საზოგადოების ასეთი ქცევა შეეშველება ქართულ ორგანიზაციებს და მისცემს მათ უფრო ეფექტური მოქმედების საშუალებას.
ბ) მეორე არანაკლებ მნიშვნელოვანი ვალდებულება, რომელიც საზოგადოებას ამ ბრძოლაში ეკისრება არის მისი დამოკიდებულება ბანკების მიმართ. ადამიანებმა არ უნდა გამოიტანონ ფული ბანკებიდან. დღეს ეს ერთ-ერთი ყველაზე დიდი საფრთხეა, რომელიც ეკონომიკას მნიშვნელოვნად დაუმძიმებს მდგომარეობას. ადამიანებმა უნდა აირჩიონ ბანკები, რომლებსაც მეტად ენდობიან და გადაიტანონ თანხები იქ, მაგრამ არავითარ შემთხვევაში არ უნდა ამოიღონ ფული საბანკო სისტემიდან, ვინაიდან ეს მულტიპლიკაციური ეფექტით შეამცირებს ფულად მასას ქვეყანაში და კიდევ უფრო დაამძიმებს ეკონომიკურ მდგომარეობას.
გ) და მესამე, ასევე ძალიან მნიშვნელოვანი ვალდებულება საზოგადოების და მისი თითოეული წევრის მხრიდან ეს არის საქმის კეთება, სხვების სამსახური და მაქსიმალური აქტიურობა ამ მიმართულებით. თითოეული უნდა ცდილობდეს, ყოველდღე გააკეთოს ის, რაც შეუძლია, თანაც გააკეთოს ყველაზე კარგად, სხვებისთვის შექმნას პროდუქტი, რამდენიც შეუძლია, და რაც შეიძლება უკეთესად. ყველას უნდა გვახსოვდეს, რომ მხოლოდ წარმოებული პროდუქტი და მომსახურება მოგვცემს საშუალებას, რომ ამ მდგომარეობიდან გამოვიდეთ. თითოეული ჩვენთაგანის მიერ გაწეული მუშაობა ყოველდღიურად იქ სადაც ვართ და იმის კეთება რაც ყველაზე უკეთ შეგვიძლია, იმ სარგებლის შექმნა, რომლისთვისაც ვართ ყველაზე მეტად მოწოდებული და არც ერთი წუთის უქმად დაკარგვა არის ის ყველაზე დიდი წვლილი, რომელიც თითოეულ ჩვენგანს ქვეყნის კრიზისიდან გამოყვანაში შეგვიძლია შევიტანოთ.
გადაუგზავნეთ მეგობრებს მეილზე
სტატიები მომზადებულია სინერჯი ჯგუფის წევრების მიერ;
— საშუალო 4,80 ქულა2 კომენტარი სტატიაზე “საერთო ბრძოლა (ანუ ვის შეუძლია ქვეყნის კრიზისიდან გამოყვანა)”
კომენტარის დამატება:
კომენტარის დაწერა შეუძლიათ მხოლოდ რეგისტრირებულ წევრებს
1 ივნისი, 2009 23:40
ყოჩაღ
კაია
2 ივნისი, 2009 12:24
გმადლობთ.. ვფიკრობ ბიზნესი კოველთვის ცდილობს იყოს მომჭირნე .ის მართლაც მუშაობს ხალხისთვის ,ანუ სახემწიფოსთვის.მაინტერესებს ხელისუფლება???? ქამრის მოჭერა ზემოდან,,,ზემოდან…