პოსტკრიზისული გარდაქმნები
სტატიის ავტორი: პაპუნა ტოლიაშვილი
29 ივლისი, 2009 | წაკითხულია 3 020-ჯერ
როგორც წამყვანი ისე რიგითი კომპანიები, სულ უფრო ცივი გონებით აფასებენ კრიზისს და მის შედეგებს. ქვეყანა ხვდება, რომ განსხვავებულ რეალობაში უწევს ცხოვრობა, რომ რაღაცები აღარასოდეს დაბრუნდება, რაღაცების დაბრუნებას კი წლები დასჭირდება.სულ უფრო პრაგმატულად, რეალურად და რაციონალურად აფასებს სიტუაციას ბევრი მენეჯერი. ყოველ დღე ამ სიას კიდევ უფრო მეტი ხელმძღვანელი ემატება. ემოციურმა ტალღამ ბევრს გადაუარა, ბევრი შეეგუა დაკარგულს და მიუღწეველს. ადამიანები შედარებით დამშვიდდნენ და იწყებენ იმაზე ფიქრს, თუ როგორ შეიცვალონ ისე, უფრო ეფექტურები და თანმიმდევრულები რომ იყვნენ ამ ახალ გარემოში, რომელიც ორგანიზაციებისაგან გაცილებით დახვეწილ, ორგანიზებულ, თანიმდევრულ, გააზრებულ ნაბიჯებს ითხოვს. ამჟამად შედეგების მიღწევა, თუნდაც ბევრჯერ უფრო ნაკლების, გაცილებით რთული იქნება. ამდენად ბევრად მეტად დახვეწილი უნდა იყოს კომპანია, თუ უნდა, რომ მნიშნელოვან შედეგებს მიაღწიოს.
კრიზისიდან გამოსვლა იწყება სწორედ მაშინ, როცა მენეჯერები გამოერკვევიან და იღებენ გადაწყვეტილებას, დაიწყონ პოსტკრიზიული გადაქმნები, მოერგონ ახალ რეალობას, ახალ გარემოს და ისწავლონ მასში ცხოვრება. ამ მომენტიდან ორგანიზაციები ახალ ცხოვრებას იწყებენ, ახალ ნაბიჯებს დგამენ, ირჩევენ ახალ სტრატეგიებს და იღებენ პირველ შედეგებს აქედან . ეს პროცესი სულ უფრო აქტიურად იწყება, შესაბამისად, კრიზისის პიკის გამოვლის ადრეული ნიშნები დღითი დღე შეუიარაღებელი თავალითაც ხილული ხდება.
ბევრი მენეჯერი იწყებს ფიქრს იმაზე, თუ რა შეცვალოს, როგორ შეცვალოს იმისათვის, რათა უფრო ეფექტური გახადოს თავისი კომპანია, საიდან დაიწყოს ეს ცვლილებები. იწყება პოსტკრიზისული გარდაქმნების პერიოდი, რომლის შედეგიც შეცვლილი გუნდები, შეცვლილი სტრატეგიები, ახალი პროცედურები, განახლებული მიდგომები და მუშაობის მეთოდები გახდება. ყოველივემ ბევრად უფრო ორგანიზებული და პროდუქტიული უნდა გახადოს ახალი დროის კომპანიები. ამ ცვლილებათა შორის არის რამდენიმე, ხშირად ყველაზე მნიშვნელოვანი, რომლებიც ყველაზე მეტად აჩქარებს ორგანიზაციების ადაპტაციის პროცესს.
დაიწყეთ გუნდით
მზად უნდა იყოთ ძირეული გარდაქმნებისთვის. ამისათვის კი ყველაზე პირველი და ყველაზე მთავარი არის ის, თუ ვისთან ერთდ ზიხართ ნავში, ვინ არიან თქვენი თანამშრომლები, რამდენად დიდია მათი ოპტიმიზმი და მზაობა – თქვენთან ერთად გადადგან რადიკალურად განსხვავებული ნაბიჯები, ძირეულად შეცვალონ საკუთარი თავი და ორგანიზაცია, იმოქმედონ გუნდურად და თავის მხრიდან გაიღონ მაქსიმუმი ამ მომქედებებში. ეს განაპირობებს თქვენს მიერ მიღებული გადაწყვეტილებების და გადადგმული ნაბიჯების ეფექტიანობას.
რაც უფრო დიდი ფინანსური რეზერვები გქონდათ კრიზისის პერიოდში, მით უფრო გაგიჭირდებოდათ თქვენთვის ყველაზე მეტად ღირებული თანამშრომლების დანახვა. თუ შეგიძლიათ, უხადოთ ხელფასი კრიზისის პერიოდში, უნდა უხადოთ, მაგრამ კრიზისის შემდეგ მნიშვნელოვანია, გარდაქმნების გუნდში დარჩნენ მხოლოდ ისინი, ვისაც სჯერა, რომ კომპანია შეძლებს ამ მდგომარეობიდან გამოსვლას, მზად არის, ძალიან უნდა თავისი მნიშვნელოვანი წვლილი შეიტანოს ამ პროცესში.
თითოეული ადამიანი, განსაკუთრებით მმართველ გუნდში, რომელიც დარჩა შეშინებული და ჯერ კიდევ ჰგონია რომ ყველაფერი ფატალურად დასრულდება, რომ გადარჩენა შეუძლებელია და ა.შ. ახლა გაცილებით უფრო დიდი პრობლემა შეიძლება იყოს, ვიდრე თვითონ კრიზისი და მისი ფინანსური შედეგები.
გაესაუბრეთ ყველას მმართველ გუნდში და ერთი დონით ქვევით, ასევე ყველას, ვინც მნიშვნელოვან როლს ასრულებენ და განსაკუთრებით ძვირფასია თქვენი ორგანიზაციისათვის. სასურველია ინდივიდუალურად, ან მცირე ჯგუფებად, ჰკითხეთ ყველას – როგორ აფასებენ კრიზისის შედეგებს, რა შეცდომები მიაჩნიათ ყველაზე კრიტიკულად კრიზისამდე და კრიზისის დროს, რა გზებს ხედავენ და რა რისკებს კრიზისიდან გამოსასვლელად. ყურადღებით მოუსმინეთ და დაინახავთ მათ განწყობას, ვის სჯერა, რომ რაღაცა გამოვა, ვის აქვს სურვილი, ამაში მიიღოს მონაწილეობა, ვინ არის მზად – გაიღოს მნიშვნელოვანი ორგანიზაციის წარმატებისთვის.
დიდი ალბათობით დაინახავთ, რომ ბევრი გამოცდილი კადრი, ვისზეც ორგანიზაცია იდგა, მნიშვნელოვნად ამორტიზირებულია, მათი განწყობა პესიმისტურია და სკეპტიკურად უყურებენ რაიმე წარმატების მიღწევას. ასეთ ადამაინებთან ერთად შემდეგ ცვლილებებზე მუშაბის გაგრძელება მართლაც მინიმუმამდე შეამცირებს სწორი გარდაქმნების განხორციელების ალბათობას.
შესაბამისად, ეძებეთ გზები, როგორ ჩართოთ აქტიურად გარდაქმნების პროცესში ისინი, ვისაც სჯერა ცვლილებების და სურს ეს ცვლილებები. ეცადეთ, უფრო მეტი იმუშაოთ მათთან ერთად. ეძებოთ გზები და გადადგათ ნაბიჯიბი სწორედ მათი მონაწილეობით. ყველაზე კარგი გზა ამისათვის შეიძლება იყოს სამუშაო ჯგუფის შექმნა სტრატეგიის განახლებისა და პოსტკრიზისული გარდაქმნების დაგეგმვა განხორციელებისათვის. აქ სწორედ ამ ადამიანებს მოუყრით თავს და მისცემთ საშუალებას, შეიტანონ წვლილი განახლებული კომპანიის მშენებლობაში.
განაახლეთ სტრატეგია
დანიშნულების რევიზია, ახალი ბიზნეს მოდელი და მთავარი კონკურენტული უპირატესობების გადახედვა არის პირველი რიგის გადაწყვეტილებები, რომლებიც გექნებათ გასააზრებელი და ჩამოსაყალიბებელი სამუშაო ჯგუფთან ერთად. ძალიან მნიშვნელოვანია სამუშაო ჯგუფის სრული და აქტიური ჩართვა ამ გადაწყვეტილებების მომზადებასა და შეთანხმებაში.
სთხოვეთ სამუშაო ჯგუფის წევრს, ჩამოაყალიბოს მოსაზრება, როგორ ხედავს ორგანიზაციის დანიშნულებას ახალ რეალობაში, რა ღირებულება შეუძლია შექმნას და მისცეს მას მომხმარებლებისთვის. ეცადეთ, მოაგროვოთ განსხვავებული იდეები, მსჯელობის შედეგად ამოარჩიოთ ის, რომელიც ყველაზე მეტად იქნება მისაღები ჯგუფის წევრებისთვის და დახვეწოთ იგი ფორმულირების დონეზე. ახალ დანიშნულებაზე ერთობლივი, ხანგრძლივი და შესაძლოა დამღლელი მსჯელობები ძალიან დაგეხმარებათ შემდეგი გადაწყვეტილებების უფრო სწრაფად და სწორად მიღებაში. ასე რომ, ნუ დაიშურებთ დროს და ძალებს ამისათვის.
დანიშნულების გააზრების და შეთანხმების შემდეგ ბიზნეს მოდელის დამუშავების დრო დგება. აქ თქვენ, თქვენს სამუშაო ჯგუფთან ერთად, კარგად უნდა გაიაზროთ – ვინ იქნებიან თქვენი მთავარი მომხმარებლები ახალ გარემოში, ვისზე უნდა დახარჯოთ თქვენი დროისა და ყურადღების მაქსიმალური ნაწილი წარმატების მისაღწევად. ეცადეთ მიიღოთ კონკრეტული გადაწყვეტილებები ერთ, ან მაქსიმუმ სამ ჯგუფთან დაკავშირებით, ვისზეც ძირითად აქცენტს გააკეთებთ.
ამის შემდეგ კარგი იქნება, თუ ბიზნეს მოდელის მეორე კომპონენტზე, პროდუქტებზე მოახდენთ კონცენტრირებას. იფიქრეთ და იმსჯელეთ – რა პროდუქტებზე აქცენტით შეგიძლიათ ყველაზე უკეთესი შედეგების მიღება. რა უნდა შეცვალოთ არსებულ პროდუქტებში, რა ახალი პროდუქტები უნდა შექმნათ პრიორიტეტული კლიენტებისათვის, რომელი ამოიღოთ საერთოდ ასორტიმენტიდან ახალი რეალობების გათვალიწინებით. ამ გადაწყვეტილებებზე მუშაობა მნიშვნელოვან განახლებას მოიტანს ხედვებშიც და მიდგომებშიც; თუ ამ პროცესსაც გუნდთან ერთად გააკეთებთ, თქვენი ქმედითუნარიანობა და ცვლილებების დასაწყებად მზადყოფნის ხარისხიც მნიშვნელოვნად გაიზრდება.
ბიზნეს მოდელის მესამე კომპონენტი, გაყიდვების მიდგომა, ასევე ერთობლივი მსჯელობების საგანი უნდა გახდეს. რა არხებით გავავრცელოთ ინფორმაცია, რა აქცენტები გავაკეთოთ გასავრცელებელ ინფორმაციაში, როგორ მივაღწიოთ კლიენტების დამატებით სტიმულირებას შესყიდვებზე? ძირითადად ეს შეკითხვები უნდა განიხილოთ ბიზნეს მოდელზე მუშაობის შემდეგ ეტაპზე. შეთანხმებული მიდგომები გაყიდვების მიმართულებით კიდევ უფრო ეფექტურს გახდის თქვენი გუნდის მოქმედებას პოსტკრიზისული გარდაქმნების პარალელურად და მის შემდეგ.
სტრატეგიაზე მუშაობის შემდეგ ეტაპზე სასურველია განიხილოთ მთავარი კონკურენტული უპირატესობების საკითხი. რა გარემოებები მოიყვანს მომხმარებელს, უპირატესად, სწორედ თქვენთან – ამ საკითხზე შეთანხმებაც ასევე არანაკლებ კრიტიკულია მოქმედებების დასაწყებად.
სტრატეგიაზე მუშაობის პროცესში სხვა საკითხების განხილვაც საჭირო და სასურველია, თუმცა მინიმუმ ზემოთ მოცემულ საკითხებზე შეთანხმება კრიტიკულ აუცილებლობას წარმოადგენს. თუ პროცესი მოგეწონათ და გაგრძელების სურვილი გაგიჩნდებათ, რა თქმა უნდა, გააგრძელეთ, მაგრამ ეცადეთ, ამის პარალელურად თვითონ ცვლილებების განხორციელების დაწყებაც არ დაგაგვიანდეთ.
დაიწყეთ პირველი ცვლილებები
სამი მთავარი ცვლილება, რომელიც სასურველია პირველ რიგში განხორციელდეს, ესენია:
ა) მართვის მოდელის ცვლილება;
ბ) მარკეტინგული მოდელის ცვლილება;
გ) ფინანსური მოდელის ცვლილება.
მართვის მოდელის ნაწილში ყველაზე მნიშვნელოვანი ცვლილება კოლეგიალური მართვის პრაქტიკის დამკვიდრება შეიძლება გახდეს. ეცადეთ, შექმნათ განვითარების საბჭო, სადაც შეიყვანთ ყველა საკვანძო მუშაკს (არა მარტო მენეჯერს), ვისი ჩართულობაც განვითარების პროცესში და ვისი ინფორმირებულობაც განვითარების მიმართულებით მიღებულ გადაწყვეტილებებთან დაკავშირებით, განსაკუთრებით მნიშვნელოვანია თქვენი ბიზნესისთვის. განვითარების საბჭოს რეგულარული შეხვედრებით, თანმიმდევრულად მიღებული გადაწყვეტილებებით და შემდეგში მათი განხორციელების პროცესის მიდევნებით მნიშვნელოვნად დააჩქარებთ კრიზისის შემდგომი განვითრების პროცესს.
მარკეტინგული მოდელის ცვლილების ნაწილში ყველაზე მნიშვნელოვანი შეიძლება აღმოჩნდეს მომხმარებელთან უკუკავშირის მეთოდების მნიშვნელოვანი დახვეწა-განახლება. ამასთან, ეს არ გულისხმობს ძვირადღირებული კვლევების სისტემატიზაციას ამ მიმართულებით. ეცადეთ განავითაროთ შიდა, შედარებით იაფი, მაგრამ მუდმივი, ქმედითი და ცოცხალი ურთიერთობის ფორმატები კლიენტებთან. გახადეთ მიღებული ინფორმაციის განხილვები, რეაგირების გზების დამუშავება და განხორციელების ორგანიზაცია განვითარების საბჭოს საქმიანობის მნიშვნელოვან ნაწილად და თქვენი პროდუქტების ასორტიმენტის დახვეწის, გაყიდვების მეთოდების , თუ არხების და სხვა მარკეტინგული აქტივობების ხარისხი და შედეგიანობა სწრაფად გაიზრდება.
რაც შეეხება ფინანსურ მოდელს, ამ ნაწილში ყველაზე მნიშვნელოვანი ცვლილება, შესაძლოა, მომსახურე ბანკის ცვლილება გახდეს. მოძებნეთ ბანკი, სადაც უფრო მნიშვნელოვანი კლიენტი იქნებით ვიდრე იქ, სადაც ხართ. იქ უფრო უკეთ ეცოდინებათ თქვენი პრობლემები , სადაც უფრო მეტად ეცდებიან, იყონ კარგი პარტნიორი თქვენთვის. სადაც, თქვენთან ერთად, კარგი პროფესიონალები იმუშავებენ თქვენი შემდგომი განვითარების სწორი ფინანსირების წყაროებზე და სქემებზე, წარუდგინეთ მათ თქვენი გეგმები, რომელსაც სტრატეგიის ფორმირების პროცესში დაამუშავებთ და ამის მოსალოდნელი ფინანსური ეფექტი, როგორც მას თქვენ ხედავთ (ამ გეგმის ფორმირების გარეშე ბანკის მოძებნა და მისი დარწმუნებაც, გახდეს თვენი პარტნიორი, გაჭირდება).
თუ ასეთი ბანკის მოძებნა ვერ შეძელით, ეცადეთ თქვენი ბიზნესის დაფინანსების ალტერნატიულ წყაროებზე იფიქროთ. ეს შეიძლება იყოს დიდი კომპანია, კერძო პირი ან პირები, ვისთვისაც თქვენი გეგმები, შესაძლოა, საინტერესო იყოს და თქვენი კომპანიაც საინტერესო პარტნიორი გახდეს. ეძებეთ ფინანსური რესურსები თქვენი პარტნიორებიდან, მომწოდებლებიდან, შემსყიდველებიდან, მათაც გაუგზავნეთ თქვენი გეგმების ამსახველი ფაილები და სთხოვეთ დახმარება, შესთავაზეთ თქვენი პირობები ამ დახმარების სანაცვლოდ. რაც უფრო კარგი იქნება გეგმა, მით უფრო დიდი იქნება შანსი – იშოვოთ ფული მისი განხორციელებისათვის.
ეს და სხვა ცვლილებები, რომლებიც, როგორც ცვლილებები, არანაკლებ მნიშვნელოვანია, ვიდრე თვითონ. შინაარსი ამ ცვლილებებისა საკმარისი შეიძლება აღმოჩნდეს კარგი სტარტის ასაღებად, დანარჩენს უკვე შემდეგი პროცესები დაგანახებთ. მთავარია, დაიწყოთ მოქმედება, გადადგათ ნაბიჯები და დააკვირდეთ მოვლენების შემდგომ განვითარებას. თქვენი პირველი მოქმედებები, პირველი ცვლილებებიც და პირველი შედეგებიც, რომელსაც აქედან გამომდინარე მიიღებთ, თქვენთვის დაასრულებს კრიზისის შემდგომი პერიოდის დასაწყისს. რაც უფრო მეტისთვის იქნება ასე, მით უფრო ადრე დასრულდება კრიზისი მთლიანი ქვეყნისათვის და თითოეული ადამიანისათვის მათ შორის.
სტატიის ნახვა შესაძლებელია სინერჯი ჯგუფის IV წიგნში “მენეჯერის ბრძოლა წარმატებისთვის” | ბმული
გადაუგზავნეთ მეგობრებს მეილზე
სტატიები მომზადებულია სინერჯი ჯგუფის წევრების მიერ;
— საშუალო 5,00 ქულაკომენტარის დამატება:
კომენტარის დაწერა შეუძლიათ მხოლოდ რეგისტრირებულ წევრებს